शितगंगा नगरपालिकामा प्रमुख प्रशासकीय अधिकृत कृष्णप्रसाद सापकोटाको आगमनसँगै विभिन्न कार्य योजनाहरू सुरु भएका छन् । पहिलो चरणमा नगर सरसफाइ तथा हरियाली प्रवर्द्धन कार्यक्रम सञ्चालन गर्दै अभियान थालिएको हो ।
नगर क्षेत्रलाई स्वच्छ र सुन्दर बनाउन सुरु गरिएको सरसफाइ कार्यक्रममा कर्मचारी, जनप्रतिनिधि लगायतको उपस्थिति रहेको थियो । नगरपालिका क्षेत्र परिसरमा सरसफाइ कार्यक्रम सञ्चालन गरिएको हो । सरसफाइलाई निरन्तरता दिँदै नगरलाई हराभरा र सफासुन्धर बनाउन अभियानलाई अघि बढाइने प्रमुख प्रशासकीय अधिकृत कृष्ण प्रसाद सापकोटाले कार्यक्रम पछि जानकारी गराउनु भयो ।
प्रमुख प्रशासकीय अधिकृत सापकोटाले सुशासन, जनमुखी कार्य र परिणाममुखी सेवामा प्राथमिकता दिने बताउनु भयो ।
यसअघि विभिन्न स्थानीय तहमा कार्यरत रहँदा उत्कृष्ट नगरपालिका बनाउन सफल भएका उनीप्रति यहाँका कर्मचारी, जनप्रतिनिधि र सर्वसाधारण उत्साहित बनेका छन् ।
जनताले नगरपालिकामा सेवाप्रवाह र सुधारका लागि धेरै अपेक्षा राखेका कारण नयाँ नेतृत्वको आगमनलाई सकारात्मक संकेतका रूपमा लिइएको छ ।
