सामाजिक सञ्जालमा देखेर रक्तदान गर्न पुगे एसपी ।।सुत्केरीको बच्यो ज्यान

कपिलवस्तु अस्पताल तौलिहवामा एक सुत्केरी आमा जीवन र मृत्युको दोसाधमा थिइन् । जन्मन नपाउँदै सात महिनाको गर्भ गुमाएकी ती महिलालाई चिकित्सकले तत्काल ४ पोकासम्म एबी पोजेटिभ रगत आवश्यक रहेको बताए । तर परिवारले जहाँतही खोज्दा पनि रगत जुटाउन सकेन ।
हतार–हतार दौडधूपपछि तौलिहवाको रक्तसञ्चार केन्द्रबाट एक पोका मात्र रगत उपलब्ध भयो । बाँकी रगत खोजी असफल भएपछि परिवारजनले सामाजिक सञ्जालमार्फत अपिल गरे । “कसैसँग एबी पोजेटिभ छ भने तुरुन्त रगत आवश्यक छ ।”
पत्रकार बासुदेव बर्माले फेसबुकमा राखेको त्यो अपिल सशस्त्र प्रहरी बल २८ नम्बर गणका सशस्त्र प्रहरी उपरीक्षक (एसपी) नेत्र केसीको नजरमा प¥यो । कुनै विलम्ब नगरी उनले पोसाक फेरे, रेडक्रस सोसाइटी तौलिहवा पुगे र आफ्नो हात चढाए रक्तदानका लागि । अहिले पनि ती महिलालाई थप २ पोका रगत आवश्यक रहेको चिकित्सकहरूले बताएका छन् ।
कपिलवस्तुमा हाल रगतको गम्भीर अभाव रहेको स्वास्थ्यकर्मीहरूले जनाएका छन् । सदरमुकाममै रक्तसञ्चार केन्द्रमा पर्याप्त रगत उपलब्ध नभएकाले आकस्मिक अवस्थामा बिरामीलाई उपचार गर्न मुस्किल परेको छ । विशेषज्ञहरूका अनुसार नियमित रक्तदान गर्ने संस्कृतिको अभावकै कारण समस्या चुलिएको हो । “रगत चाहिँदा मात्रै मानिसहरू सक्रिय हुन्छन्, तर नियमित रक्तदान गर्ने बानी भने अत्यन्त कमजोर छ,” एक स्वास्थ्यकर्मीले भने । यसैकारण दुर्घटना, शल्यक्रिया वा आकस्मिक अवस्थामा बिरामीहरूलाई तत्काल रगत जुटाउन चुनौती बढ्दो छ ।