अर्घाखाँचीमा एमालेको अपिल : युवालाई पार्टी र समाज परिवर्तनमा सक्रिय सहभागिताको आह्वान
अर्घाखाँची, भदौ २५ । नेपाल कम्युनिष्ट पार्टी (एमाले) अर्घाखाँची जिल्ला कमिटीले वर्तमान राजनीतिक परिस्थितिमा युवाहरूको भूमिकालाई केन्द्रीय बनाउँदै पार्टी र समाज निर्माणमा सक्रिय सहभागिताका लागि अपिल गरेको छ ।
जिल्ला कमिटीका अध्यक्ष पीताम्बर भुसालले हस्ताक्षर गरी जारी गरेको विज्ञप्तिमा हाल देश गम्भीर राष्ट्रिय राजनीतिक मोडमा रहेको उल्लेख गर्दै जनजीवनलाई सहज बनाउन युवाहरूको संगठित योगदान अपरिहार्य रहेको बताएका छन् । उनले विशेष गरी Gen-Z पुस्ता मुलुकको राजनीतिक, सामाजिक र आर्थिक परिवर्तनमा निर्णायक भूमिकामा रहनुपर्ने आवश्यकता औंल्याएका छन् ।
विज्ञप्तिमा अर्घाखाँचीका युवा, विद्यार्थी, श्रमिक, किसानलगायतलाई एमाले पार्टीमा संगठित भई आ–आफ्नो गाउँ, टोल र वडामा जनसंगठन विस्तारमा सक्रिय हुन आह्वान गरिएको छ । साथै, भ्रष्टाचार, बेरोजगारी, विदेशी निर्भरता, शिक्षा र स्वास्थ्य क्षेत्रका विकृति विरुद्ध सशक्त आन्दोलन गर्नुपर्नेमा जोड दिइएको छ ।
अध्यक्ष भुसालद्वारा जारी विज्ञप्तिमा हालै उत्पन्न भएका घटनाहरूलाई संवेदनशील रूपमा लिँदै पार्टीभित्र ऐक्यबद्धता, अनुशासन र संगठन विस्तारलाई अझ मजबुत बनाउनुपर्ने निष्कर्ष समेत निकालिएको छ । विज्ञप्तिमा भनिएको छ, “युवाले आफ्नो भविष्य आफैं बनाउने हो, मुलुकलाई स्थायित्व र विकासतर्फ लैजान सामूहिक योगदान दिनुपर्छ।”
जिल्ला कमिटीले पार्टीका सबै संरचना, जनसंगठन र जनसमुदायलाई एकताबद्ध रहन आग्रह गर्दै आगामी दिनमा हुने सम्भावित चुनौतीलाई सामूहिक बलले सामना गर्ने प्रतिबद्धता समेत जनाएको छ ।
अर्घाखाँचीमा एमालेको अपिल : युवालाई पार्टी र समाज परिवर्तनमा सक्रिय सहभागिताको आह्वान
यो खबर पढेर तपाईलाई कस्तो महसुस भयो ?
खुसी
दुःखी
अचम्मित
हाँस्यास्पद
आक्रोशित
प्रतिक्रिया
